Kritika-Letersi » Në mundsh - Nga Joseph Rudyard Kipling

Në mundsh - Nga Joseph Rudyard Kipling

Dy versione të perkthimit të poezisë së Kipling nga F.Noli & Robert Shvarc

Në munç
Përkthyer nga Fan S. Noli

Në munç të mbash në kokë terezinë
Kur shokët çmender dhe fajtor të nxijnë;
Në munç të kesh besim, kur të dyshon
Kushdo, dhe s'ka njeri që të beson;
Në munç të preç, dhe pritjen s'e kursen,
Në të gënjefshin, ti nuk i gënjen,
Në të urrefshin, ti s'i çan me brirë,
Dhe s'hiqesh as m'i mënçim as m'i mirë.

Në munç të çndërrosh e të mejtosh,
Dhe nga këto në mos u robërofsh;
Në munç të preç Triumfin dhe Hatanë,
Dhe t'i shkelmosh të dy si kallpazanë;
Në munç të mbahesh, kur një dreq ta dreth
Të drejtën dhe në lak syleshin heth,
Kur sheh kalan' e jetës të rëzuar
Dhe prap e ngre me veglën e çkallmuar;

Në munç të vësh m'i grumbull çdo thesar,
Edhe t'i loç të gjitha me një zar,
T'i humpç edhe të nisësh përsëri
Pa thën' asgjë për këtë batërdi;
Në munç të kesh një zemër, trup e kokë
Që të shërbejnë sa të bëhen trokë,
Dhe të vazhdosh i djegur shkrump në furrë,
Dhe të thërret vullneti: "Mbahu, or burrë!"

Në munç të zbreç në turm' e të mbash nderin,
Të hash me mbretin, të pish me neferin;
Në mos të ngaftë dot as mik as hasmë,
N'i daç të gjithë, po asnjë për dasmë;
Në munç për çdo minutë të përpjetë
Të rënç tamam sekunda gjashtëdhjetë;
Zaptove dhenë me çdo mall dhe hir,
Dhe ca më mirë, qënke trim, or bir!

* * *

Në mundsh...
Përkthyer nga Robert Shvarc

Në mundsh ta ruash arsyen, kur bota humbet fillin
e fajin ty ta hedh dhe vetes t’i besosh,
sa herë tek ti dyshojnë e s’të përfillin
por edhe dyshimet drejt t’i gjykosh...
Në mundsh të rrish në pritje, nga pritja pa u lodhur,
e, kur t’urrejnë, urrejtje mos t’ushqesh,
madje, ndaj shpifjeve të rrish pa folur,
me thjeshtësi, me to pa rënë ndesh...

Në mundsh t’mendosh, por jo gjer në shkatrrim,
të ëndërrosh, por jo si rob ëndërrimesh,
dhe t’i trajtosh njëlloj e pa dallim
ngadhnjim e shpartallim burim mashtrimesh. ..
Në durofsh dot thëniet e tua të drejta
në kurthe për trutharët, kopuket që t’i kthejnë,
t’i shohësh të thyera gjërat më të shtrenjta
e prapë t’i ndërtosh me vegla që nuk vlejnë...

Në mundsh fitoret që ke korrur t’i flijosh
si në kumar, në një të vetme lojë,
të rrezikosh, të humbasësh e prapë t’ia fillosh,
dhe humbjen kurrë të mos e zesh në gojë...
Në i detyrofsh dot muskul, nerv e puls e zemër
të të shërbejnë edhe kur gjithçka duket e kotë,
e të qëndrosh kur s’ke asgjë më veç vullnetit,
që vetëm fjalën “Qëndro!” gjithmonë të thonë...

Në mundsh të flasësh me maskarenj, por nderin tënd ta ruash
e t’ecësh përkrah mbretit pa krenari që të verbon...
Nëse armiku apo miku s’të bëjnë dot të vuash,
dhe gjithkend e çmon, por veç sa meriton...
Në mundsh t’i mbushësh ti minutat aq të renda
me vepra që peshojnë
dije dhe mos kij asnjë dyshim,
se jotja do të jetë Bota, me ç’ka brenda,
dhe BURRË do të jesh, o biri im!

Joseph Rudyard Kipling (1865-1936)

Lindi ne Bombei, Indi. Ka banuar ne shume vende te botes, Angli, Afrika e Jugut, ne SHBA (Vermont, New England) etj. Ne vitin 1907 ka fitura çmimin “Nobel” ne letersi, pasi ka refuzuar nje sere çmimesh te tjera. Vdiq ne Janar 18, 1936 ne Londer.

“Une gjithmone i kam ndjere rreziqet e muzgjeve te neteve tropikale,
ashtu siç kam dashuruar feshferimen e lehte te eres se nates ne palmat e bananet,
dhe kengen e bretkosave te pemeve.”

Nga shenimet autobiografike “Diçka per veten time”

Postoi Raimonda Moisiu

Postuar: 20/12/2008 | Ora: 18:27:49 | Komente 15 | Shikuar: 9137

Kommentet

21/12/2008, 17:36:33 Linda shkruan:

Monda Nuk e di a eshte kjo poezi e njejte me keto dy poezite qe keni sjelle ju. Eshte e Kiplingut e perkthyer nga Petraq Kolevica me ka pelqyer shume.

Nëse

Nëse do të jesh i qetë e s’do hutohesh,
Kur e humbet toruan krejt gjithkush,
Nëse besnik do t’i qëndrosh vetvetes,
Kur s’të beson as shoku e askush,
Nëse do dish të presësh i duruar,
Gënjeshtrës me gënjeshtër mos t’i gjegjesh,
Nëse s’bëhesh i keq dhe n’u paç vënë në shenjë
Po as të shenjtë veten mos ta mbash,

Nëse do dish si t’i sundosh pasionet
E s’do t’i lësh të të sundojn’ ata,
Nëse i fortë je në gas e në mjerim,
Se të dy kanë po të njejtin çmim,
Nëse qëndron, kur fjalën tënde
Ta merr e ta bën kurth një batakçi,
Dhe në u shëmbsh të mund të çohesh prapë
Të rifillosh nga puna përsëri. -

21/12/2008, 18:09:23 Monda M. shkruan:

Linda ,pershendetje ,
Une nuk e kam lexuar te Petraq Kolevices.
Keto m'i derguan pardje ne posten time private nje gazetar nga Korca .
Do e pyes edhe per versionin e Z.Petraq ,se mos e disponon .
Te falminderit shume
Me respekt
Monda Moisiu -

21/12/2008, 18:12:46 M.Moisiu shkruan:

Oh ,Linda ,me fal se tani e pashe ,Edhe Kritikes i kerkoj NDJESE-.
Eshte e njejta poezi.
Shume e bukur qenka.Une mendoj se te treja versionet qendrojne.
Shume faleminderit e perseri
Ndjese!
Respekte
Monda -

22/12/2008, 09:02:39 Linda shkruan:

Monda e gjeta te plote poezine

REDJARD KIPLING
(1865-1936)
- Angli –

Nëse...

Nëse do të jesh i qetë e s’do hutohesh,
kur e humbet toruan krejt gjithkush,
nëse besnik do t’i qëndrosh vetvetes,
kur s’të beson as shoku e askush,
nëse do dish të presësh i duruar,
gënjeshtrës me gënjeshtër mos t’i gjegjesh,
nëse s’bëhesh i keq dhe n’u paç vënë në shenjë,
po as të shenjtë veten mos ta mbash,

nëse do dish si t’i sundosh pasionet
e s’do t’i lësh të të sundojn’ ata,
nëse i fortë je në gaz e në mjerim,
se të dy kanë po të njëjtin çmim,
nëse qëndron kur fjalën tënde
ta merr e ta bën kurth një batakçi,
dhe në u shembsh të mund të çohesh prapë,
të rifillosh nga puna përsëri,

nëse do të jesh i aftë që të gjitha
t’i vësh mbi tavolinë, në kumar,
të humbësh e t’ia nisësh nga e para,
pa t’ardhur keq dhe se ke humbur ar,
dhe nëse zemër, nerva e damarë,
i vë që t’ecësh para e nuk ngec,
kur vitet shkojnë e shkon fuqi e parë
dhe veç vullneti yt të thotë: “Ec!”,

në qofsh mes turmës, prapë të jesh vetëm,
në qofsh me mbretin, miqtë mos harro,
nderoje çdo mendim të tjetrit,
po kokën mos e ul para kujtdo.
Nëse do dish t’i matësh me sekonda
edhe më të mëdhatë largësi,
ta dish, o bir, se toka do të jetë jotja
edhe përveç kësaj, ti do të jesh njeri. -

14/09/2009, 13:43:55 ina1616@yahoo.com shkruan:

Nga te gjitha perkthimet dalloj ate te Robert Shvarc.Nje poezi qe te mahnit dhe qe esht perkthyer me mjeshteri nga perkthyesi i siper permendur. -

08/02/2010, 15:02:14 eva shkruan:

vjershe e papame ne mundsh -

01/04/2010, 16:17:52 al shkruan:

shume e bukur ajo e F.Nolit
KA DIT TI ZGJEDH FJALET -

24/05/2010, 11:09:25 Kastrioti shkruan:

Per mua kjo poezi eshte nje nga kryeveprat e letersise botrore dhe se perkthimi i Shvarts me duket se edhe me i perkryeri dhe se jep te plote idene e autorit.
Faleminderit per vemendjen. Kastrioti -

25/05/2010, 10:04:16 Ylli shkruan:

Te gjitha perkthimet shume te mira
Ne gjuhen shqipe tingellojne si ar
Se kjo gjuhe e bekuar Perendie
Eshte e mbrujtur me xhevair dhe nektar. -

03/02/2011, 14:19:12 Ina Angel shkruan:

Me pelqen shume kjo vjershe...eshte nje vjershe ne forme keshillash dhe nese nuk gabohem flet per nje baba i cili i edukon te birin qe te behet nje njeri me karakter te forte deh te ekuilibruar per te perballuar sfidat e jetes...nese se kam kuptuar gabim...eshte fantastike si vjershe... -

12/02/2011, 14:08:24 Genta shkruan:

MOnda.
Esht hera e pare qe po e hap kete faqe dhe ju pergezoj per punen qe beni.
do t`ua dija per nder ne qoftese do me tregonit ndonje poezi ose poeme te Joseph.R.Kipling sepse e kam per detyre. ju faleminderit shume dhe suksese.
Ju lutem me ndihmoni -

08/10/2011, 21:15:54 rony shkruan:

te gjitha versionet jane te bukura, por mendoj se versioni m ei mire mbetet ai nga robert shvarc...
"...t’i shohësh të thyera gjërat më të shtrenjta
e prapë t’i ndërtosh me vegla që nuk vlejnë..." -

23/06/2012, 18:38:38 Artenida shkruan: